What is Ramzan / Ramadan in Telugu | రంజాన్ ప్రాముఖ్యత
రంజాన్ (Ramzan/ Ramadan):
- పండుగ అనేది ఏ మతానికి సంబంధించినది అయినా సరే, దాని వెనుక ఒక సందేశం, ఒక శాస్త్రీయత, ఒక సదాచారం దాగి ఉంటాయి.
- ముస్లీంలు చాంద్రమాన (ఇస్లామిక్/ హిజ్రీ) క్యాలెండర్ ను అనుసరిస్తారు. ఈ క్యాలెండర్ లోని నెల/తేదీలు స్థానికంగా చంద్రోదయంపై ఆధారపడి ఉంటాయి. ఇందులో తొమ్మిదవ నెల పేరు రంజాన్.
- ఇస్లాం ధర్మంలో రంజాన్ మాసానికి చాలా ప్రాధాన్యం ఉంది. ముస్లీంల పవిత్ర దైవ గ్రంథం ఖురాన్ అవతరించింది ఈ రంజాన్ మాసంలోనే.
- నెలవంక (Crescent Moon) కనిపించిన తర్వాత స్థానిక మతాధిపతులు ఈ పండుగను ప్రకటిస్తారు.
- అరబ్బీలో 'రమ్జ్' అంటే దగ్ధం కావడం అని అర్థం. మనసా వాచా కర్మేణా ఉపవాస దీక్షలు నిబద్ధతతో పాటించిన వారి పాపాలు కాలిపోతాయని ప్రతీతి.
- పండుగ ప్రాముఖ్యం: రంజాన్ మాసంలో చేసే ఉపవాస దీక్షతో మానవునిలో నిగ్రహణ శక్తి, ఆత్మ ప్రక్షాళనతో పాటు ఆరోగ్యవంతమైన జీవనం సాగుతుందని నమ్మకం. ఓర్పు, పవిత్రత, సమయపాలన, దానశీలత, సామరస్యం, అనురాగం, మానవత్వం వంటి అంశాలపై దృష్టి కేంద్రీకృతమవుతుంది.
ఉపవాసం (రోజా):
- ఈ రంజాన్ నెలలో విధిగా ఆచరించవలసిన నియమం ఉపవాసం (Fasting).
- ఉపవాసాన్ని పార్సీ భాషలో రోజా అంటారు.
- స్వర్గానికి ఎనిమిది ద్వారాలుంటాయని ముస్లీంల విశ్వాసం. వీటిలో ఒకదాని పేరు రయ్యాన్. ఉపవాసాలు పాటించిన వారికే ఈ ద్వారంలో ప్రవేశం లభిస్తుందనేది నమ్మకం.
- 29/30 రోజుల ఉపవాస దీక్ష తమలోని దయార్ద్రతను చాటి మానవత్వ విలువల్ని వెలికి తీస్తుంది.
- సూర్యోదయానికి సుమారు గంటన్నర ముందు తీసుకునే ఆహార నియమాన్ని సహూర్ అంటారు.
- సూర్యాస్తమయం తర్వాత ఖర్జూరపు పండుగాని, ఇతర ఫలాలను గాని తీసుకుని ఉపవాస దీక్షను విరమించడాన్ని ఇఫ్తార్ అంటారు.
- రోజాలో ఉండగా ఉమ్మిని మింగరాదు, బీడీ, సిగరేట్ లాంటివి కాల్చడం చేయరాదు. మద్యం సేవించరాదు, చాడీలు చెప్పుట, ఇతరులను దుర్భాషలాడడం, అబద్ధం చెప్పుట, చెడు పనులు చేయుట నిషిద్ధాలు.
నమాజ్:
- రంజాన్ మాసంలో రోజా పాటిస్తూ, రోజుకు ఐదుసార్లు నమాజ్ చేస్తూ, మసీదులలో ఎక్కువ సమయం గడుపుతారు.
- ఐదుసార్లు చేసే నమాజులు,
- ఫజర్ (సూర్యోదయమునకు పూర్వము)
- జూహర్ (మధ్యాహ్నం తర్వాత)
- అసర్ (సూర్యాస్తమయానికి పూర్వము)
- మగరీబ్ (సూర్యాస్తమయం వద్ద ప్రారంభమవుతుంది)
- ఇషా (అర్ధరాత్రి ముందు)
- ఈ నెలలో రాత్రి చేయు ప్రత్యేక ప్రార్థనలను తరావీహ్ అంటారు.
దానధర్మాలు:
- ఆస్తిలో (సంపాదనలో) నుంచి నిర్ణీత మొత్తాన్ని పేదలకు దానం చేయడాన్ని జకాత్ అంటారు.
- మూడు పూటలా తిండికి, ఒంటినిండా బట్టకు నోచుకోని పేదవారు, అభాగ్యులకు పండగ సందర్భంలో దానం చేయాలని ఇస్లాం మతం బోధిస్తోంది.
- దానం పాప పరిహారమని, పాప విముక్తికి మార్గంగా చెబుతారు.
హలీం:
- రంజాన్ అనగానే గుర్తుకు వచ్చేది హలీం. ఎంతో బవవర్థకం, రుచికరం. ప్రత్యేక పొయ్యిపై గంటల తరబడి గోధుమలు, మాంసం, డ్రైఫ్రూట్స్, సుగంధ ద్రవ్యాలతో ఉడకపెట్టి దీన్ని తయారు చేస్తారు.
ఈద్-ఉల్-ఫితర్:
- ఇస్లామిక్ (హిజ్రీ) క్యాలెండర్‌లోని పదవ నెల అయిన షవ్వాల్ మొదటి రోజున ఈద్-ఉల్-ఫితర్ జరుపుకుంటారు. ఇది రంజాన్ నెలకు ముగింపు రోజు.
